Plantun de Prouvènço

Pèr coumpara dos planto d'encò nostre

Gaudinia fragilis & Panicum barbipulvinatum

Gaudinia fragilis

Poaceae Graminaceae

Nom en français : Gaudinie.

Descripcioun :
Aquelo meno de pichot civadoun trachis dins li prado umido l'ivèr e ié flouris à la fin de la primo. S'escound entre-mitan di gràndis erbo e lou fau un pau cerca pèr lou vèire. Se recounèis pamens à sa longo enflourejado d'ounte parton d'arèsto mai o mens torso e peréu à si fueio bèn peludo (fotò). La lengueto èi membranouso. Un cop maduro, l'enflourejado èi di proun brouvo, o roumpadivo s'amas miés.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Grando erbo
Taio : 10 à 60 cm
Fueio : costo paralèlo
Tipe bioulougico : Teroufite
Cicle bioulougico : Planto de l'an

Gènre : Gaudinia
Famiho : Poaceae
Famiho classico : Graminaceae

Ordre : Poales

Coulour de la flour : Jauno
Petalo : ges
Ø (o loungour) enflourejado : 5 à 40 cm
Flourido : Printèms - Estiéu

Sòu : Si (Ca)
Autour basso e auto : 0 à 800 m
Aparado : Noun
Mai à juliet

Liò : Prado umido - Pelouso - Champino
Estànci : Termoumediterran à Coulinen
Couroulougi : Eurimediterrano
Ref. sc. : Gaudinia fragilis (L.) P.Beauv., 1812

Mi(-de-ribeirés)

Panicum barbipulvinatum

Poaceae Graminaceae

Noms en français : Panic des rivages, Millet des rivages.

Descripcioun :
Aquéu mi fèr, que nous vèn d'Americo de l'uba, sèmblo proun au mi-prim, Panicum capillare, que se rescontro proun dins lis ermas e li champ à l'autouno. Se n'en destrìo emé sis espigueto de coustat que soun pourtado pèr de pecou courtet (< 3 mm) e que rèston proun proche de la ramo (< 10°). D'un biais generau lis espigueto soun mens aluenchado lis uno dis autro. Apoundèn qu'aquéstis espigueto soun mens grosso e pu fino. Pèr l'ouro es esta vist soulamen dins la valado dóu Rose, mai poudèn pensa qu'aquesto meno vai s'espandi. Coumpara emé lou mi-prim e lis àutri mi se n'avès pas l'usanço.

Usanço :
A bessai li mémis usanço que soun cousin lou mi-prim.